මීට හේතුව රාහු කාලය ශුභ කටයුතුවලදී යොදා නොගන්නා බව බොහෝ දෙනෙක් දැන සිටීමයි.
එය ජ්‍යොතිෂ සිද්ධාන්ත ග්‍රන්ථවල මෙන්ම ගෘහස්ථ බිත්ති ලිතෙහි පවා දක්වා ඇත.
මේ අනුව ජ්‍යොතිෂය පිළිබඳ නිසි වැටහීමක් නැති අය පවා රාහු කාලය මඟ හැර කටයුතු කර නිසිඵල නෙළා ගැනීමට උත්සුක වෙති.
රාහු කාලය පිළිබඳව කිසිවෙක් තර්ක විතර්ක ඉදිරිපත් නොකරන්නේ එය සෘෂි මතයක් නිසාවෙනි. එය නිස්සාර මානසික තත්ත්වයකින් ගොඩනැඟුණු හුදු උපකල්පනයක් පමණක් නොව ඈත විශ්වයේ නොපෙනෙන මානයේ සිදුවන විශ්ව ක්‍රියාවලියක් නිසා ඇතිවන අශුභ තත්ත්වයකි.
ඒ අනුව රාහු කාලයේ ගැඹුරු බව හා අර්ථවත් බව අපට වටහා ගත හැකිය. එහෙයින් අවුරුදු ලක්ෂ ගණනකට ඈත අතීතයේ සිටම ජනතා පිළිගැනීමකට ලක් වූ ඉසිවර මතයකට අපි ද ගෞරව කළ යුතු වෙමු.
ශුභ කටයුතුවලදී රාහු කාලය අත්හළ යුතු වූවත් අශුභ කටයුතුවලදී ඉන් වැඩගන්නා ආකාරය පිළිබඳව ද ඇතැම් ජ්‍යොතිෂ ග්‍රන්ථවල දක්වා තිබේ.
එනම් රාහු හයවැන්නේ තබා සාදන ලද නැකතකට අනුව රාහු කාලයේ අවසාන මිනිත්තු අටේ දී යමයා වෙනුවෙන් දෙකොන දැල්වෙන පහනක් තබා ස්ත්‍රෝත්‍ර ගායනා කොට කරවල හෝ ලුණු දැමූ මාංශ සමඟ බත් අනුභව කොට දකුණු දිශාවට පියවර 07ක් ගොස් නැවත හැරී අසෙකු පිට නැඟී යන බව සිතා බස්නාහිර දිශාවට මුහුණලා ගමන් කිරීමෙන් සියලු සතුරන් විනාශ කළ හැකි බව චූල ජ්‍යොතිෂයේ පෙන්වා දෙයි. මෙය යුද කටයුතුවලදී යොදා ගත හැක.
සම්මතයේ පවතින රාහු කාලය සකසා ඇත්තේ ඉර උදාව උදේ හයට යන උපකල්පනයට අනුවය. එහෙත් සමහර මාසවල අලුයම 05.30ට පමණ ඉර උදාව සිදුවේ. එවිට සම්මතයේ පවතින රාහු කාලයත් එවන් දිනවල පවතින රාහු කාලයත් අතර දැඩි වෙනසක් ඇති වේ.
එසේ වූ විට බිත්ති ලිතෙහි හෝ දින පොතෙහි සටහන් වී ඇති රාහු කාලයට අනුව වැඩකටයුතු සිදුකරන මහජනතාවට සිදුවන්නේ විශාල අසාධාරණයකි. මන්ද ඉර උදාවට අනුව රාහු කාලය වෙනස්වන බව ඔවුන් නොදැන සිටීමයි.
එම නිසා සාමාන්‍ය ජනයා භාවිතා කරනු ලබන බිත්ති ලිතට හා දින පොතට දවස් තුන්සිය හැටපස් දවසේ රාහු කාලය යෙදෙන අවස්ථා ඇතුළත් කරන්නේ නම් ජ්‍යෝතිෂ ශාස්ත්‍රයටම කරනු ලබන ගෞරවයකි.
අප රාහු කාලය ගැන නිතර කතා කළ ද එය යෙදෙන ආකාරය පිළිබඳව නොදනී. ජ්‍යොතිෂයේ පෙන්වා දෙන ආකාරයට රාහු කාලය යනු හිරුගේ දැඩි බලපෑමට හසු වූ කාලයයි.
එය “රාවණා” යන්නෙහි අර්ථ නිරූපණය කර ඇති ආකාරයෙන් අපට වටහා ගත හැකිය. හිරු කුල නායකයා රාවණාය. ඒ අනුව “රා” යනු හිරුට කියන තවත් නමකි. රා+අසු යනු හිරුට අසු වූ යන්නයි. “රාසු” පසු කලෙක “රාහු” වී ඇති බවට ද මතයකි.
රාහු කාලය පිළිබඳව ලියැවී ඇති පත පොත ඉතාම අල්පය. රාහු කාලය සකස්වන ආකාරය පිළිබඳව වගුවක් සකස් කර ගැනීමේ දී දිවා මානය හෝ රාත්‍රී මානය කොටස් 8 කට බෙදෙයි.
එහි පළමු කොටස දිනාධිපතියාට වෙන් වෙයි. එතැන් සිට පිළිවෙළින් කොටස් අටට බෙදිය යුතුය. උදාහරණයක් ලෙස ඉරිදා පළමු කොටස රවිට ද දෙවන කොට චන්ද්‍රයාට ද තුන්වන කොටස කුජට ද ආදී වශයෙන් අනුපිළිවෙළින් සප්ත ග්‍රහයින් සටහන් කරන විට ඉරිදා අග කොටස රාහුට අයත් වේ.
මෙසේ සත්දින රාහු කාලය යෙදෙන ආකාරය වගුවක සටහන් කරගත් විට රවිට අයත් කොටසේ රාහු කාලය යෙදී ඇති බව අවබෝධ කරගත හැකිය.
සතියේ දින 07 රාහු කාලය යෙදෙන ආකාරය
ඉරිදා - 04.30 සිට 06.00 දක්වා
සඳුඳා - 07.30 – 09.00 දක්වා
අඟහරුවාදා - 03.00 - 04.30 දක්වා
බදාදා- 12.00 – 01.30 දක්වා
බ්‍රහස්පතින්දා - 01.30 – 03.00 දක්වා
සිකුරාදා -10.30 – 12.00 දක්වා
සෙනසුරාදා - 09.00 – 10.30 දක්වා
ඉහත ආකාරයෙන් රාහු කාලය යෙදෙන බව සටහන් වුව ද ඉර උදාවට අනුව එය දිවා කාලයට හා රාත්‍රී කාලයට යෙදෙන ආකාරය වෙන වෙනම සකසා ගත යුතුය.
රාහු කාලය ඇතුළත දී දිව්‍යමය ශුභ මුහූර්ථ යෙදෙන බව සෘෂි මතයකි. ඒ අනුව රාහු කාලය මඟ හැරිය නොහැකි අවස්ථාව අත්‍යාවශ්‍ය කටයුත්තකදී රාහු කාලය පවතින අවස්ථාවේ යෙදෙන දිව්‍යමය ශුභ මුහුර්ථ ශුභ කටයුතුවලට යොදා ගනී.
කෙසේ වුව ද කිසිවෙකුටත් තර්ක විතර්ක ඉදිරිපත් කොට වෙනස් කළ නොහැකි රාහු කාලය ඉසිවර මතයකි.
- ධම්මිකා වෙලේගොඩ
0 comments:
Post a Comment