මනාව වැඩුණු ගෝනුස්සකු අවයව විහිදුවාගෙන සිටින ආකාරයක් දක්වන තාරකා පන්තියකි.රාශි මණ්ඩලයේ අටවැන්නේ ස්ථාපිතය.එනම් අටවැනි රාශියයි.
අංශක 210 සිට 240 දක්වා ප්‍රදේශයක ව්‍යාප්තව පවතී.
දහවල් කාලයේ බලවත්ය.සෞම්‍ය, මූඨගති ඇති, තිර රාශියකි. ආපෝ ගුණය,කාල වර්ණය ඇති නිශ්ශබ්ද ස්ත්‍රී රාශියකි. කුජ හෙවත් අඟහරු අධිපතියා වෙයි. නමුත් මූල ත්‍රිකෝණ බලය (කුජගේ වැඩි බලය ඇත්තේ) මේෂයටය.
කුජ වෘශ්චිකයේ අධිපතියා වුවද සතුරුස්ථානය අධිපති වන හෙයින් ශුභ ග්‍රහයෙකු ලෙස සලකනු නොලැබේ.නමුත් ලග්නාධිපති බැවින් වැඩි අශුභයක් නොදේ.
සඳු වෘශ්චිකයට පැමිණි කල බල රහිත වන්නේය.නීච ක්ෂේත්‍ර වන බැවින් සියලු සුබපල අහෝසි වී අකර්මණ්‍ය භාවයට පත්වේ.
වෘශ්චිකයේ භාග්‍යස්ථානාධිපතියා සඳුය.පුර චන්ද්‍රයා වී නව වැන්නේ සඳු සිටියේ නම් ඒකාන්ත වශයෙන් ශුභ ග්‍රහයෙක් වන්නේය.
වෘශ්චික රාශියේ දී කිසිදු ග්‍රහයෙක් උච්ච ස්වභාවයට පත්නොවේ.වෘශ්චික අධිපති කුජ ග්‍රහයා තුන්වැන්නට පැමිණියේ නම් උච්චක්ෂේත්‍රව හෙවත් රජ බවට පත්වන්නේය.මේ ලග්නයෙන් උපන්නවුන්ට බුධ,සිකුරු,කුජ පාපියෝ වන්නේය.
ගුරු,සඳු දෙදෙනා ශුභයෝ වෙති.නවය හා දහය අධිපති රවි,සඳු නියම රාජ යෝගය ගෙන දේ.ඔවුන් සියලු සුබ පල ගෙන දේ.අට එකොළහ අධිපති බැවින් බුධ ද මාරකයා වෙයි. වෘශ්චිකයේ අෂ්ඨමාධිපති බුධය.බුධ මහ දශා කාලවලදී හා වෙනත් පාපී ග්‍රහයෙකුගේ මහ දශාවක බුධ අන්තර් දශාව ලැබුවේ නම් පරිස්සම් විය යුතුය.වෘශ්චික හිමියා‍ගේ ජන්ම පත්‍රයේ බුධ පස් වැන්නේ සිට බුධ මහ දශාව ලැබූ විට පිරිසිදු පිළියම් නොයෙදෙව්වොත් ඔත්පලවන රෝග සෑදේ.හත දොලහ අධිපති බැවින් සිකුරු ශුභපල නොදේ.ගුරුට දෙක අධිපතිකම ලැබුණොත් පහ අධිපතිද සිකුරු බැවින් මාරක නොවේ.ශුභ පල ඇත.
හතරවන නවාංශකයේ (අංශක 13 දශම20 හා 16 දශම 40 අතර)උත්පත්තිය ලැබුවොත් බලගතු අයෙකි.වර්ගෝත්තම වෙයි.
කුජ දෝෂයෙන් උපන්නේ නම් විවාහයට තදින් බලපායි.මේ රාශියේ උපන් අය යහපත් සේ වැඩුණු ශක්තිමත් ඥානවන්ත ධෛර්යවන්ත කඩිසර සහජ හැකියා ඇති දක්ෂයෝය.දුක සැප එකසේ බාර ගනී.ගුප්ත කටයුතු වලට ඇලුම් කරයි.තියුණු නුවන ඇති සියලු කටයුතු ඉෂ්ට කර ගැනීමට උත්සහ කරන චරිතයකි. යුක්තිය හඳුනාගත්තොත් පමණක් යමක් පිළිගනී.හිතවත් වුවොත් පමණක් ගරුකරයි.
'මම වෙලාවට කරන්නම් ' කියා කල් දමමින් පසුවේ. තවත් යමෙකුට කරන්න පුළුවන් නම් තමාට එය බැරි ඇයි යන අදහස නිසා හැමවිටම ඕනෑම කටයුත්තකට අත ගසයි. කෙසේ හෝ එය කරයි.විශ්වාසය අතින් ඉහළ යයි. කරන දේ හරියටම කරයි. රහස් රකී. යමක් දුටු පමණින් ග්‍රහණය කරගනී.එය කිරීමටද දක්ෂ වේ. කොයි දේත් හරියටම කරන්න බලයි. කෙසේ නමුත් එළිපිටම වැඩකරන මුහුණට දමා ගසන ගති ඇත්තෙකි.ගුණ දහමට කැමති ඉක්මනින් අවබෝධකර කර ගන්නා ඊට ආශා ඇත්තන්ය.
ගුප්ත ශාස්ත්‍රයට ඇලුම් කරයි.මරණය ඉන්පසු වනදේ,භූත ලෝක වැනිදේ සෙවීමට ප්‍රියය.
සිරිත් විරිත් වලට ඇළුම් කරයි.සහජ දක්ෂතා නිසා කැපී පෙනේ. ආත්ම විශ්වාසය ඇත.දෙපා බිම නො අතුල්ලා ඇවිදියි.
මායමක් නැතිව තම අදහස් අන්‍යයන්ට කීම දුර්වලතාවයකි.තම අදහස් වලට පටහැනි වූ විට වහා කිපේ.තරහ ගියවිට කිසිවෙක් ගැන නොසිතයි.වැඩකල් දමා නිකරුණේ කල් මරා අවසාන මොහොතේ එය කෙසේ හෝ සිදුකිරීම,තරමක කුඩුකේඩු ගති මේ අයගේ දුර්වලතාය.
මුත්‍රාශය, ගර්භාශය,ආශ්‍රිත රෝග ,ඉක්මනින් සෑදෙන දරුණු ,බලවත් වේදනා ඇති රෝග නිතර සෑදේ.
ජන්ම පත්‍රයේ ග්‍රහ පිහිටීම් ,ගොචරය,ග්‍රහ යෝග,ලබන්නා වූ දශා හා ඒවායේ කාලය ආදී කරුණු අනුව මේ ප්‍රතිපල වෙනස් වන බව සිතට ගන්න.
ප්‍රවීණ ජ්යොතිෂවේදී කලා භූෂණ ජ්‍යොතිෂ විද්‍යාරත්න
රාජ්‍ය සම්මානලාභී මීපේ ගණිතගේ චන්ද්‍ර භාරතී
0 comments:
Post a Comment